[VIRAL] Batang naulila ng nanay, dinadala ang bunsong kapatid sa paaralan para lang ‘di lumiban

Image from Shyla Mie Brillantes Blasico's post via Facebook

MAYNILA, Pilipinas – Isang nakaaantig na larawan ng magkapatid ang kumakalat ngayon sa social media na ibinahagi ng isang guro noong isang araw lamang.

Sa larawang ito ay makikita ang isang batang estudyante na kalong-kalong ang kaniyang bunsong kapatid habang nag-aaral sa loob ng classroom.

Ayon kay Shyla Mie Brillantes Blasico, ang guro na nagbahagi ng nasabing larawan sa kaniyang Facebook, isa sa mga estudyante niya ang nasabing bata.

Namatay umano ang ina ng mga ito noong nakaraang taon sanhi ng ‘ectopic pregnancy’.

Wala umanong magbabantay sa nakababatang kapatid nito kaya isinasama na lamang ng estudyante ang kanilang bunso sa paaralan para lang maiwasang lumiban.

“Pinapakain nlng nmin cla sa skol pag lunch time para d nlng umuwi tuwing tanghali,” kuwento pa ng guro. “Hopefully may mga mabubuting puso dyan na tutulong.”

Sa panayam ng ABS-CBN News kay Teacher Shyla, napag-alaman na ang bata ay si Mateo Baño, isang mag-aaral sa Grade 3 sa J. Blanco Elementary School sa South Cotabato.

Tatlo umanong magkakapatid sina Mateo at ang panganay ay nasa Grade 5 sa parehong eskuwelahan din.

Palit-palitan umano ang dalawang magkapatid sa pag-aalaga sa kanilang bunso, ayon pa kay Teacher Shyla, habang ang kanilang ama ay nagtatrabaho bilang karpintero.

Image capture from Shyla Mie Brillantes Blasico's post via Facebook
Image capture from Shyla Mie Brillantes Blasico’s post via Facebook

“Minsan sa kapitbahay pinaiiwan yung bata. May tumutulong din naman,” kuwento pa ng guro. “Tinatanong ko kung sino nagluluto…yung kuya lang daw.”

Simula umano nang ibahagi niya ang larawang ng magkapatid, nakatanggap na rin ang mga ito ng kaunting tulong mula sa mga may mabubuting puso.

Bagama’t may mga nagbigay na umano ng pera, mas kailangan daw ng pamilya ang pagkain tulad ng bigas, at ganun na rin ang iba pang pangangailangan.

Marami naman ang naantig sa larawan ni Mateo at ng kaniyang kalong-kalong na kapatid. Umani na ito ng samut’-saring reaksyon at nakakuha na ng mahigit 10,000 shares.

Sa mga nagnanais daw tumulong, maaaring kontakin si Teacher Shyla, na bagama’t hindi nag-iwan ng cellphone number ay maaari pa ring padalhan ng mensahe sa kaniyang Facebook account.

Loading...