LSI nagsabit ng tarpaulin para ianunsiyo ang pagnegatibo sa COVID-19

Imahe mula sa facebook post ni Arvee Gayares
  • Isang LSI ang nagpagawa ng tarpaulin na isinabit niya sa harap ng kanilang bahay
  • Ito ay para ianunsiyo sa madla ang pagnegatibo niya sa COVID-19
  • Ginawa umano niya ito para maiwasan ang diskriminasyon

Sa panahon ngayon hindi biro ang maging locally stranded individual o LSI at lalong hindi biro ang masuspetsahang may coronavirus.

Dahil dito, isang 25 anyos na medical representative ang nakaisip ng paraan para maiwasan ang diskriminasyon laban sa kaniya ng kaniyang mga kababayan.

Galing umano sa Maynila si Ray Vincent Amador at kauuwi niya lamang sa kaniyang bayan sa Isabela matapos ma-stranded. Dahil isa siyang LSI, kailangan niyang dumaan sa home quarantine ng 14 na araw bilang bahagi ng protocol.

Imahe mula sa Facebook post ni Arvee Gayares

Katatapos lamang ng kaniyang home quarantine nitong Miyerkules at nagnegatibo naman kaagad siya sa coronavirus matapos dumaan sa RT-PCR Test.

At para maiwasang ma-discriminate ng kaniyang mga kababayan, nagpagawa ng malaking tarpaulin si Amador at isinabit ito sa harap ng kanilang bahay.

Nais lamang daw niyang ipaalam sa publiko na dapat ay walang diskriminasyon para sa mga tulad niyang LSI na natigil sa ibang lugar at posibleng nakasalamuha ang mga COVID positive.

Kinaaliwan naman sa social media ang ginawa ni Amador.

“Isama sa tarp ang certificate of completion and result ng swab test,” wika ng isang netizen.

“Hindi na yan puputaktihin ng tsismosa at judgmental na kapitbahay…” ayon naman sa isa pa.

Imahe mula sa Facebook post ni Arvee Gayares

Nag-trending din sa Facebook ang mga larawan ng tarpaulin ni Amador na ibinahagi ni Arvee Gayares. Heto pa ang ilan sa mga komento:

“Kesa ma bash witty na lang ang fam hahaha mabilis kumalat chismis lalo LSI si kuya.”

“It looks funny, pero ang message nito is malala kasi discrimination kaya nagpa tarpulin na lang para tapos ang tsismis.”

“Pa ganyan din kaya ako kasi mga bata dito kapag nakikita ako sa terrace, nagtatakbuhan. My God.”

Loading…