Meralco ginisa sa ‘magulong’ bill’; sulat-paliwanag ipadadala sa mga konsyumer

Imahe via DF Balita
  • Meralco ginisa dahil sa magulong bill para sa tatlong buwan
  • Nangako ang Meralco na magpapadala sila ng sulat para makapagpaliwanag
  • Aayusin din umano nila ang kasalukuyang proseso sa pagbabayad at mga reklamo

Ginisa ng ilang senador ang Meralco dahil sa tila ‘magulong’ bill na dumating sa mga kustomer para sa mga buwan ng Marso, Abril at Mayo.

Ayon kay Senador Sherwin Gatchalian, ang chairman ng Energy committee, partikular siyang naguluhan sa bill para sa buwan ng Mayo.

Imahe via Facebook

Halimbawa na lamang umano sa kaniyang condo unit na bihira naman niyang gamitin ay nakatanggap siya ng ‘estimated bill’ na P10,244.55 para sa Marso at P10,315.13 para sa Abril. Subalit nang dumating muli ang bill niya para Mayo, ito ay umabot na lamang sa P3,386.05.

“Isa lang ako ha; we’re talking about 6.5 million Meralco consumers. I’m only one and maraming ganitong complaint kaming nakukuha. But you really need to sit down and validate one by one,” anang senador.

Inamin naman ng Meralco na mayroon nga silang pagkukulang sa pagpapaliwanag sa publiko para sa bill ng buwan ng Mayo, subalit iginiit nito na hindi naman umano na-overcharge ang condo unit ng senador.

“There’s no overcharging, sir, on your bill because your May already reflected your consumption based on the reading that we did… Your consumption in the month of May is actually lower so it means that what happened during that period was that anything that was overly estimated in March and April was already adjusted in your May consumption,” paliwanag ni Meralco First Vice President Victor Genuino.

Imahe via DF Balita

Subalit ayon kay Gatchalian, hindi ito nakalagay sa bill na dumating kaya hindi maliwanag kung nabawas ba ang ‘overestimated bill’ ng nakaraang dalawang buwan.

“So how will we find out kung adjusted na ‘yun? You expect me to blindly trust Meralco?” tanong ng mambabatas.

Dahil dito, nangako ang Meralco na magpapadala sila ng sulat sa bawat kustomer para maipaliwanag nang mahusay ang pagkalito sa tatlong buwang bill.

Magdadagdag din umano sila ng mga call center agent para sagutin ang mga tawag at email na natatanggap nila mula sa mga nagrereklamong kustomer. Pag-iibayuhin din daw nila ang kanilang proseso lalo pa’t maraming tao ang pumipila ngayon sa kanilang mga tanggapan upang magbayad kahit pa lubhang mapanganib dahil sa kasalukuyang pandemiya.

Loading…