ABS-CBN, “Best TV Station” sa 18th Gawad Tanglaw

  • Wagi ang ABS-CBN bilang “Best TV Station” para sa 18th Gawad Tanglaw
  • Humakot din ng parangal ang kanilang mga TV shows at personalities
  • Gaganapin ang awarding ceremony sa Setyembre 20, 2020

Kahit hindi umeere sa free TV dahil sa hindi pagkakaroon ng bagong prangkisa, ABS-CBN pa rin ang hinirang na “Best TV Station” ng 18th Gawad Tagapuring mga Akademisyan ng Aninong Gumagalaw o Gawad Tanglaw , bukod pa sa mga major awards na nakuha ng ilang mga programa at TV personalities nito.

Para sa mga pinakamahuhusay na programa, nakuha ng “TV Patrol” ang Best News Program, Best TV Documentary ang “Heroes in the Hot Zone” ni Raffy Bosano ka-tie ang “i-Witness” (Ako si Patient 2828 ni Howie Severino) ng GMA Network. Best Drama Series ang “Pamilya Ko” at Best Variety Show ang “ASAP Natin ‘To.”

Public Domain Image

Nakatanggap naman ng special award para sa Sining ng Edukasyong Pantelebisyon at Kalikasan ang mga Kapamilya shows tulad ng “G-Diaries,” “Hiraya Manawari,” “Sineskwela,” “Mathinik” at “Knowledge Channel.”

Para naman sa ANC o ABS-CBN News Channel, nagwagi bilang Best Sports Program ang “Game Time” at “Sports Unlimited.” Best Public Affairs ang “Strictly Politics.”

Para naman sa mga personalidad, Best Presenter si Christian Esguerra ng “Matters of Fact” sa ANC, Best Sports Program Host sina Dyan Castillejo at Migs Bustos ng ANC, at Best Talk Show Hosts sina Boy Abunda para sa “Tonight With Boy Abunda” at Martin Nievera para sa “LSS: The Martin Nievera Show” na napapanood din sa ANC.

Nakakuha naman ng pagkilalang Excellence in Philippine Media Reportage ang DZMM anchors na sina Doris Bigornia, Alvin Elchico at Jorge Cariño.

Para naman sa larangan ng pag-arte sa telebisyon at pelikula, Best Actress in a Single Performance si Irma Adlawan sa episode na “Passport” ng “Maalaala Mo Kaya” o MMK habang si Allen Dizon naman ang Best Actor in a Single Performance para sa “Kailan Naging Ama ang Isang Babae: The Roxanne D’ Sales Epic Story ng “Magpakailanman ” ng GMA Network.

Public Domain Image

Para naman sa pelikula, kinilala ang husay sa pag-arte nina Alden Richards at Kathryn Bernardo para sa highest-grossing film of all time na “Hello, Love, Goodbye” na kauna-unahang pagtatambal ng dalawa. Best Supporting Actor din si Joross Gamboa at Best Supporting Actress si Dimples Romana para sa pelikulang “Persons of Interest.” Kinilala rin ang pag-arte ni Carlo Aquino sa pelikulang “Isa Pa With Feelings” at Alice Dixon para sa “Nuuk.”

Best Actress naman si Judy Ann Santos  at Best Actor naman si Allen Dizon para sa pelikulang “Mindanao” ka-tie si Jansen Magpusao para sa pelikulang “John Denver Trending” na entry sa Cinemalaya.

Nakatanggap naman ng Jury Award for Best Performance si Iza Calzado para sa mga pelikulang “Culion” at “Pandanggo sa Hukay.”

Dahil sa pandemya, nakatakdang isagawa ang awarding ceremony sa Setyembre 20, 2020 subalit limitado lamang ang mga aanyayahang makadadalo.

Source :

ABS-CBN News, Push, Trendsmap

Loading…