- Biglang lumitaw ang isang ‘unauthorized post’ sa Twitter account ng HoR nitong Lunes
- Larawan ito ng isang batang babae na may caption ng kaniyang birthday countdown
- Iniimbestigahan na umano ang pangyayari, ayon sa HoR Twitter handle
Habang nagkakagulo ang mga kongresista sa Kamara nitong Lunes, nag-trending naman sa Twitter ang official account ng House of Representatives dahil sa walang kaugnayang post na bigla na lang lumitaw doon.
Dakong alas-6 ng hapon noong Lunes, habang nasa kasagsagan ang girian para sa speakership nina Taguig Rep. Alan Peter Cayetano at Marinduque Rep. Lord Allan Velasco, ay lumabas ang larawan ng isang batang babae na may caption para sa countdown ng kaniyang kaarawan.
“Almost my bday!!” ayon sa caption na may nakasulat pang “6 Hours until my Birthday” sa larawan.
Kaagad namang na-delete ang nasabing post subalit hindi pa malaman kung sino ang nasa likod nito. At gaya ng inaasahan, mabilis na nakakuha ng screenshot ang mga nagulat na netizens upang gawing ‘resibo’.
Napilitan naman na maglabas ng pahayag ang Twitter account ng HoR makaraan ang ilang oras dahil sa pangyayari.
“An unauthorized post was made on the House Twitter account earlier today. The post was deleted immediately and the House social media admins are now investigating the incident,” anang Twiiter post ng HoR dakong alas-diyes ng gabi.
Ayon pa sa sumunod na post, ginawan na ng kaukulang aksiyon ang nasabing ‘unathorized tweet’.
“Appropriate measures were put in place to ensure the security of the account,” dagdag pa ng Twitter handle.
Gayunpaman, dismayado ang ilang netizens sa nangyari. Anila, hindi nila maunawaan na isang bata lamang pala ang may hawak ng official Twitter account ng HoR.
“The idea that a kid is running the social media account of the Philippine House of Representatives,” ayon sa isang commenter.
“Haven’t you made a joke of yourselves with APC and Lord in your ranks?” dagdag naman ng isang Twitter user.
Ang iba naman ay idinaan na lang sa biro ang nangyaring ‘sablay’ at pinaulanan ng pagbating ‘Happy Birthday’ ang mga post ng HoR Twitter.