Buwis-buhay na pagliligtas ng police officer, tanod sa 3 residente ng Isabela hinahangaan

Image by Cris Sansano/News5 via Facebook
  • Pagliligtas ng police at tanod sa tatlong residente sa rumaragasang baha, nag-trending
  • Officer Jayrick Talosig nakatanggap ng “Medalya ng Kadakilaan”
  • Sinabi ni Talosig na hindi raw sila nag-alangan na mailigtas ang mga nangangailangan ng tulong

Paghanga ang natatanggap ngayon ng isang police officer at isang barangay tanod makaraang mag-trending ang buwis-buhay nilang pagliligtas sa tatlong residente na nalulunod patawid sa rumaragasang tubig sa nabahang kalsada sa siyudad ng Ilagan City, Isabela.

Image by Cris Sansano/News5 via Facebook

Nakilala ang mga itinuturing na bayaning sina Patrolman Jayrick Talosig ng Isabela City Police Station at Barangay Tanod Richard Ocampo.

Hindi nag-alangan sina Talosig at Ocampo na iligtas sina Arnel Talaue na Sangguniang Kabataan Chairman ng barangay at dalawa pang residente nang makita nilang nalulunod ang mga ito patawid sa nabahang kalsada.

Pahayag ng police officer sa Bombo Radyo Cauayan, nauna na raw nilang pinaalalahanan ang dalawa na huwag tumawid sa kalsada dahil delikado pero hindi ito pinakinggan ng dalawa at nagpumilit.

Nasabi rin nito na hindi madali ang kanilang ginawa. Sa kabila nito, hindi raw sila nag-alangan na suungin ang baha at iligtas ang mga nangangailangan ng tulong.

Pinaalalahanan niya ang mga mamamayan na makinig sa mga abiso ng mga kinauukulan para sa kanilang kaligtasan.

Dahil dito, nakatanggap si Talosig ng “Medalya ng Kadakilaan” o Philippine National Police (PNP) Heroism Award. Kasama niyang nakatanggap si Patrolman Brayan Bangayan na nagligtas naman sa isang babae na nagdadalantao.

Image by Cris Sansano/News5 via Facebook

“I am proud of what the Valley cops are doing to help alleviate the sufferings of the typhoon victims. Let us continue to give our best to ensure that no further harm will be experienced by our people because of this disaster,” ang pahayag ni PRO-2 Director Brig. Gen. Crizaldo Nieves nang ibigay ang pagkilala sa dalawa.

Komento naman ng isang netizen sa post ng News5, “Jayrick Talosig at Richard Ocampo, nakakahanga ang ang pagkatao ninyo. Huwaran kayo ng pagiging mabuting ugali ng mga Pilipino. Saludo po kami sa inyo.”

Kudos sa inyo!

Imahe mula sa PNP-Facebook

Loading…