‘Pandemic’ itinuring na ‘Word of the Year’ ng Merriam-Webster

Imahe mula sa CGTN
  • Tinaguriang ‘Word of the Year’ ng Merriam-Webster ang salitang ‘pandemic’
  • Hanggang sa kasalukuyan ay ito ang may pinakamaraming bilang ng online searches
  • Nagsimula itong mag-trending noong Enero at sumipa sa pinakamaraming bilang noong Marso

Hindi na nakagugulat na ang tinaguriang ‘Word of the year’ ngayong taon ay ang salitang nagdulot ng takot at pangamba sa lahat ng tao sa buong mundo – ang ‘pandemic’.

‘Pandemic’ o pandemya sa salitang Filipino ay siyang napili bilang pinakapopular na salita sa taong 2020 ng Merriam-Webster at maging ng Dictionary.com dahil na rin sa COVID-19 crisis na umiiral sa kasalukuyan.

Imahe mula sa World Nomads

Ayon sa Merriam-Webster, nagsimulang dumami ang searches ng salitang ‘pandemic’ noong Enero hanggang Pebrero kung kailan naitala ang sinasabing mga pinakaunang kaso ng coronavirus.

Subalit biglang sumipa ito sa pinakamaraming search nong Marso, partikular na noong Marso 11 matapos ideklara ng World Health Organization (WHO) ang COVID-19 bilang isang pandemic. Ayon sa datus ng Merriam-Webster, tumaas ito ng 115,806% kumpara sa kaparehong petsa noong nakaraang taon.

Imahe mula sa CDC

Simula noon ay hindi na bumaba ang bilang ng naghahanap ng kahulugan at mga kaugnay na kasaysayan nito online hanggang sa kasalukuyan, ayon pa sa dictionary publisher.

“That probably isn’t a big shock. Often the big news story has a technical word that’s associated with it, and in this case, the word ‘pandemic’ is not just technical but has become general. It’s probably the word by which we’ll refer to this period in the future,” ayon kay Peter Sokolowski, editor-at-large ng Merriam-Webster.

Maging ang mga sumunod na mga salitang may pinakamaraming bilang ng searches ay yaong may kaugnayan din sa ‘pandemic’ tulad ng ‘asymptomatic’, ‘quarantine’ at ‘coronavirus’.

Imahe mula sa Cebu CIty Public Information Office

Ayon naman sa Dictionary.com, ang ‘pandemic ay ang “defining context of 2020” at dahil dito, ang mga salitang ‘social distancing,’ ‘flatten the curve’ at ‘herd immunity’ ay naiintindihan na ngayon ng karamihan at hindi lamang ng mga propesyonal.

Ang ‘pandemic’ ay nag-ugat sa mga Griyegong salita na ‘pan’ na ang ibig sabihin ay ‘all’ o lahat, at ‘demos’ na nangangahulugan ng ‘people’ o tao.

Loading…