Textbook ng private school gumamit ng Pinoy slang na umano’y ‘nakaiinsulto’

Imahe mula sa ABS-CBN News
  • Viral ngayon sa social media ang pahina mula sa aklat na ginagamit ng isang private school
  • Gumamit kasi ng Pinoy ‘slang’ ang libro na tila nakaiinsulto
  • Maaari daw itong i-report ng mga department supervisors para maayos, ayon sa DepEd

Kumakalat ngayon sa social media ang ilang pahina ng isang textbook na gamit umano ng isang pribadong eskuwelahan na naglalaman ng mga Pinoy slang na mistulang nakaiinsulto.

Mababasa kasi sa isang pagsasanay sa nabanggit na aklat na ginamit ang salitang ‘chipipay’ upang ilarawan ang isang tao. Ang ‘chipipay’ ay isang Pinoy slang, at gay lingo na rin, na ang ibig sa bihin ay ‘cheap’.

“Hayun si Alex kasama si Rona na chipipay,” ayon sa isang pangungusap.

Imahe mula sa ABS-CBN News

Ayon sa nagbahagi ng kopya ng aklat, na nakausap ng ABS-CBN News, wala siyang nakikitang aral na maaaring matutunan ang estudyante sa paggamit ng nasabing slang.

“I was shocked not at the gay lingo but the use of lingo as insult. This is not what we should teach our kids,” wika ng Facebook user.

“Describing Rona as chipipay? What is the educational benefit of that?” ayon pa sa user na inaming ginagamit ang libro ng kaniyang pamangking nag-aaral sa private school.

Bukod sa ‘chipipay’, ginamit din ang salitang ‘Ting-ting Cojuangco’ para ilarawan naman ang katawan ng isang babae.

Ang ‘Ting-ting Cojuangco’ ay pangalan ng isang sikat na pulitiko at socialite na nagmula sa probinsiya ng Tarlac. Subalit ang salitang ‘Ting-ting’ bilang isang Pinoy slang ay nangangahulugan ng sobrang payat.

Imahe mula sa Facebook/Move.PH

Isa umano itong uri ng ‘body-shaming’, ayon din sa Facebook user.

Sa panayam ng ABS-CBN News, sinabi ni Ariz Cawilan, director ng Bureau of Learning Resources ng DepEd, na maaaring i-report ng mga department supervisors ang kanilang mga napansin at naobserbahang mali sa mga learning materials ng mga private schools.

“This means that if [private schools] are using outdated [or] erroneous LRs or LRs that are not in line with the present curriculum ay puwedeng gumawa siya ng recommendations  for the school to improve,” paliwanag ng DepEd official.

Noong Setyembre, nag-viral din sa social media ang modules ng isang private school sa Zambales dahil sa paggamit ng malalaswang pangalan.

Loading…