Idyomang “natutulog sa pansitan”, ano ang pinagmulan?

  • Nabuksan ang kuryosidad ng mga netizens sa etimolohiya o pinagmulan ng idyomatikong pahayag na “natutulog sa pansitan”
  • Ipinaliwanag ng isang netizen sa isang Facebook page ang nakapaloob na kuwento sa likod nito
  • Ang pansit-pansitan ay isang uri ng halamang matatagpuan sa kabukiran, na kadalasang pinaghihigaan ng mga magsasaka para sa pamamahinga

Minsan ba sa buhay mo ay napagsabihan kang “natutulog sa pansitan?”

Ang naturang pahayag ay isang halimbawa ng “idyomatikong ekspresyon” para sa mga Pilipino. Iyan ang ibinahagi sa Facebook page na “Memories of Old Manila” ng netizen na nagngangalang “Tom Ong.”

Imahe mula sa Facebook page na Memories of Old Manila / Public Domain Image

Ayon sa kaniynag pagbabahagi, ang naturang idyomatikong pahayag ay nakaugat sa mga kuwento-kuwento at karanasan ng mga magsasaka. Ito raw ay tungkol sa pagpapabaya na humahantong sa pagkawala ng oportunidad.

“Ang pansit-pansitan ay isang uri ng halaman sa kabukiran. Isang uri ng damuhan na nagbibigay-ginhawa kapag nahihigaan. Kadalasan ang mga magsasaka ay nagpapahinga sa mga halamang pansitan sa bukid. Sila ay nakakatulog nang mahimbing at matagal habang nakahiga sa pansit-pansitan,” paliwanag niya.

“Ang nangyayari ay hindi natatapos ang gawain sa bukid kung kaya pinagpapabukas na lang ang trabaho sa bukid.

Ang aral na ito ay sumasalamin sa kasabihan na business first before leisure. Pero ang nangyayari ay leisure first before business.”

“Ang nangyayari ay pagpapasarap muna bago gumawa o magtrabaho kung kaya ang magandang oportunidad sa buhay ay nawawala,” dagdag pa niya.

Umani naman ito ng iba’t ibang reaksyon at komento mula sa mga netizens.

“Ngayon ko lang nalaman ‘yan samantalang noon, madalas akong mahiga sa bukid kapag nagpapastol ako ng itik sa bukid at ang nangyari, minsan nauunahan ako ng mga itik ko sa kulungan nila, hapon na pala magdidilim,” sabi ng isa.

Public Domain Image

Turan naman ng isa, “Yes madalas naririnig ko sa nanay namin noong maliliit pa kami, magsibangon na raw kami at huwag patulog-tulog sa pansitan. Akala ko noong una, sa panciteria o tindahan ng mga pansit hahaha, iyon pala sa isang uri ng halaman nag-originate.”

“Ang alam namin ang ibig sabihin ng ‘natutulog sa pansitan’ ay nakakatulog ang costumers sa pansiteria ni Akong Chekwa dahil sa bagal ng kusinero? Hahaha,” pagbabahagi naman ng isa.

Ano man ang tunay na pinagmulan o pinag-ugatan ng idyomatikong pahayag na ito, iisa lamang ang tiyak: huwag babagal-bagal, huwag tatamad-tamad, lalo na kapag may bagong oportunidad!

Source :

Facebook

Loading…